राजपरिवारको सम्पत्ति राष्ट्रीयकरण गर्न समिति गठन
सरकारले राजा ज्ञानेन्द्र र राजपरिवारको सम्पत्ति राष्ट्रीयकरण गर्ने प्रक्रिया अगाडि बढाएको छ। सोमबार बसेको मन्त्रीपरिषदको बैठकले सो प्रक्रियालाई अघि बढाउन भौतिक योजनामन्त्री तथा नेपाली काङ्ग्रेस (प्रजातान्त्रिक) का गोपालमान श्रेष्ठको अध्यक्षतामा तीन सदस्यीय समिति गठन गरेको छ। समितिमा अन्य सदस्यहरूमा नेकपा एमालेका धर्मनाथ शाह र नेपाली काङ्ग्रेसका दिलेन्द्रप्रसाद बडु रहेका छन्।
सो समितिले राजा र राजपरिवारको सम्पत्ति राष्ट्रीयकरण गर्ने उपायहरू सिफारिस गर्ने बताइएको छ। आफूहरूलाई सो काम गर्न ३० दिन दिइएको बताउँदै समितिका अध्यक्ष वरिष्ठमन्त्री श्रेष्ठले "भूमी सुधार मन्त्रालयले यस सम्वन्धमा धेरै काम गरिसकेको छ त्यसैले हामीलाई दिइएको समयभित्र यो काम गर्न सकिन्छ यस बारेमा म राजदरबारसित कुरा पनि गरौंला र मलाई अवश्य नै सहयोग प्राप्त हुनेछ भन्ने लाग्दछ।
राजा र राजपरिवारको सम्पत्तिको पूर्ण विवरण अहिलेसम्म सार्वजनकि गरिएको छैन। गत साता प्रजातन्त्र दिवसका अवसरमा सन्देश दिएपछि राजा विभिन्न पक्षका आलोचनाको तारो बनेका छन्। अन्तरिम संसदले शाही सन्देशको भर्त्सना गर्दै राजामाथि कार्वाही गर्ने गत साता सर्वसम्मतीबाट सरकारलाई निर्देशन दिएपछि, सोमबार बसेको मन्त्रीपरिषदको बैठकले शाही सन्देशलाई अनधिकृतको संज्ञा दिएको थियो।
