तराई फेरि बन्द, जनजीवन अत्यन्तै कष्टकर
विभिन्न समूहले छुट्टाछुट्टै माग राखेर आव्हान गरेको पूर्वी तराई बन्द आइतबार पनि जारी छ । विगत पाँच महिनादेखि निरन्तररुपमा गरिदै आएको तराई बन्दका कारण त्यहाँको जनजीवन अस्तव्यस्त हुनुका साथै अत्यन्त कष्टकर बन्दै गएको छ ।गृहमन्त्री कृष्णप्रसाद सिटौलाले पूर्वाञ्चलका सुरक्षा प्रमुखहरूलाई राजमार्ग खोल्नका लागि सुरक्षा संयन्त्र अपनाउन निर्देशन दिनुभए पनि बन्द राजमार्ग अझै ठप्प छन् ।
आफ्ना माग पूरा गराउन दबाव दिने भन्दै राजमार्गलाई निशाना बनाउने क्रम तराईमा बढिरहेको छ ।
ट्रक व्यवसायी सङ्घ, आदिवासी जनजाति महासङ्घको विद्यार्थी सङ्गठन र विष्फोट सिंह नेत्तृत्वको जनतान्त्रिक तराई मुक्ति मोर्चाले पूर्वी तराईमा छुट्टाछुट्टै बन्दको आव्हान गरेका छन् ।
विभिन्न बहानामा विभिन्न पक्षले गरेको बन्दका कारण पूर्वी नेपालसँगको यातायात सम्पर्क विच्छेद भएको एक साताभन्दा धेरै भइसकेको छ । बन्दले मोरङ, सुनसरी, झापा, सिराहा, सप्तरी, सर्लाही, धनुषा, महोत्तरी, रौतहटलगायतका जिल्लाको जनजीवनमा प्रत्यक्ष असर पारेको छ ।