राष्ट्रसंघीय महासचिव वान कि मुन नेपाल आईपुगे
संयुक्त राष्ट्र संघका महासचिव वान कि मुन दुई दिने नेपाल भ्रमणका लागि आज काठमाडौ आइपुग्नु भएको छ। भारतको नयाँ दिल्ली हुँदै राष्ट्र संघीय विशेष विमानमार्फत काठमाडौ आइपुग्नु भएका महासचिव वानलाई त्रिभुवन अन्तर्राष्ट्रिय विमानस्थलमा परराष्ट्र मन्त्री उपेन्द्र यादवले स्वागत गर्नुभएको थियो ।उहाँ राष्ट्र संघको विशेष विमान सीआरजे-२०० मार्फत काठमाडौं आइपुग्नु भएको हो । महासचिव वानले आजै प्रधानमन्त्री पुष्पकमल दाहाल प्रचण्डसँग भेटवार्ता गर्नुहुनेछ । महासचिव वान प्रधानमन्त्री प्रचण्डले होटल याक एण्ड यतिमा आयोजना गर्नुहुने रात्रीभोजमा सरिक कार्यक्रम रहेको परराष्ट्र मन्त्रालयले जनाएको छ। महासचिव वान नेपाली हिमश्रृङ्खला अवलोकनका लागि शनिबार बिहान ६.३० बजे नेपाली सेनाको हेलिकोप्टरबाट माउन्टेन फ्लाइट जाने कार्यक्रम छ । त्यसपछि उहाँले बिहान ८ बजे राष्ट्रपति डा. रामवरण यादव, ८.३० बजे परराष्ट्र मन्त्री उपेन्द्र यादव, ९ बजे पूर्व प्रधानमन्त्री तथा नेपाली कांग्रेसका सभापति गिरिजाप्रसाद कोइराला र १०.३० बजे संविधानसभाका अध्यक्ष सुवासचन्द्र नेम्बाङसँग भेट गर्नुहुनेछ ।शनिबार पत्रकार सम्मेलन गरेपछि महासचिव वान लुम्बिनी भ्रमणका लागि १२.३० बजे भैरहवा प्रस्थान गर्ने कार्यक्रम छ। लुम्बिनीको भ्रमणपछि वान बंगलादेशतर्फ प्रस्थान गर्नुहुनेछ । संयुक्त राष्ट्र संघका आठौं महासचिव वान नेपाल आउने पाँचौं महासचिव हुनुहुन्छ । यसअघि राष्ट्र संघीय महासचिवहरु कुर्ट वाल्धेइमका र कोफी अन्नानलगायतले नेपालको भ्रमण गरिसक्नु भएको छ।लुम्बिनी विकास कोषको गुरुयोजना तयार गराउनुमा तत्कालीन महासचिव कुर्ट वाल्धेइमको महत्वपूर्ण योगदान रहेको छ। नेपालको शान्ति प्रक्रियामा अन्मिनमार्फत संयुक्त राष्ट्र संघले सक्रिय रुपमा सकारात्मक भूमिका गरेको र नेपालको शान्ति प्रक्रिया विश्व समुदायसामु उदाहरणीयसमेत रहेकाले वानले नेपालको भ्रमण गर्न लाग्नु भएको बताइएको छ।
